Mio Caro Sior Paron Zaneto,

So bacante [?] per el gusto che ti staghi ben e che ti vegni a cagar in acqua. Diman de sera andaremo in Orchestra, e, tempo permetendo, la sera del 5 sarà la prima recita. E siccome volemo goderte come che ti meriti, e farse goder come che meritemo cussì te prego de vegnir all’Europa dove che ghe xe ancha el gran mago. Faghe pur i corni a Danieli, ti ghe sarà fedel un’altra volta, ma per questa, vogio anzi volemo cussì.

Sta sera farò copiar el libreto della Traviata, e te lo mandarò; no l’ho fato prima, perché credo de aver fenio ancuo solamente tutte le necessarie varianti:

Che musica! che robba! Quante svanzeghe a tutti forchè a mi che so desparà più de Luca che no gavarà mai più gnianca un peto del nostro Annientatore de tute ste mone che voran esser maestri e che lo invidia.

Ghè un prindisi che ti lo sentirà cantà da mi la prima volta che disnaremo insieme all’Europa e te farà vegnir l’acqua in Bocca. -

Bondì caro e mio coccolo, saludime la Marieta, alla qual, la se intende, vogio star vicin a tola e anzi ghe farò la corte.

Desbrighite, fa i bauli e vien perché te aspeto co’ tanto de cuor averto. Verdi te saluda tanto, e mi te prego anca de saludar Tito, e l’amigo Emanuele.

Vogime ben perché mi te assicuro che me lo merito. Vien presto

Bondì Bondì

Zaneto

                                   L’amigo

                                    M Piave

24/2/53.